കൈനറ്റിക് ഊർജ്ജം

പാളം തെറ്റിയ തീവണ്ടിയെഞ്ചിൻ
പുഴയിലേയ്ക്ക് കൂപ്പുകുത്തുമ്പോൾ
പുറകേ മുപ്പത് ബോഗികൾ
കൈകാലടിച്ചു
പുഴയിൽ മുങ്ങിമരിച്ചതും

ഇഴഞ്ഞുപോകുന്ന
തേരട്ടയുടെ തലഞ്ഞെരിക്കുമ്പോൾ
അത് ചുരുണ്ടുപോകുന്നതും

ഫിസിക്സ് ക്ലാസിലെ
കാമസൂത്രം
സോറി
കൈനറ്റിക് ഊർജ്ജം കൊണ്ടാണ്

മുപ്പത് ബോഗികൾ തമ്മിലോ
തേരട്ടയുടെ കാലുകൾ തമ്മിലോ
ഒരു പുക്കിൾക്കൊടിയാൽ
പിണഞ്ഞിരിക്കുന്നില്ല
ആനത്താഴിട്ട് പൂട്ടിയ
ചങ്ങലകളാൽ കൂട്ടിക്കെട്ടിയിട്ടില്ല

കൈനറ്റിക്കോർജ്ജം
സമം
ബിന്ദു റ്റീച്ചറുടെ ഛായയിലെ
ഫാഫിനു ശേഷം
ഒരു മുഴുത്ത എം‌വീസ്ക്വയർ
തികട്ടി നിൽക്കുന്നത്